幸運奇兵走規熟練 兆文 03/04/2026 「幸運奇兵」霍宏聲拍退役馬跳3段，直路輕鬆擺脫退役馬，走規更見熟練，外觀又省鏡。「好運年」助手跳兩段，愈來愈放鬆，出腳輕快有彈力，進度愈見出色。「堅先生」田泰安跳兩段，豎尾且冇轉腳，卻冇稚嫩感，神態昂揚。 「金快飛飛」助手跳兩段，比起過往已規矩好多，而且出啱腳勁度充沛。 「紅衣醒目」田泰安跳兩段，毛色烏卒卒好睇，最吸引冇咁心急快慢由人。「三代至醒」希威森拍「歷勝」跳3段，「三代至醒」落後追上反應一般，遲轉腳且過終點後餘勢欠勁被拋離。 「文明福星」班德禮跳兩段，昔日重口兼內閃，轉倉後變得收斂唔同咗款。「千帆駒」奧爾民跳兩段，氣定神閒再多添成熟感。 「金鑽貴人」梁家俊跳3段，輕描淡寫好似唔使用力，身壯實淨外觀亦靚。「機械之星」布文跳兩段，火旺神生充滿急勁感，馬身粗壯展現線條美。「嘉應高昇」助手跳一段，慢速完成一貫冇轉腳，比過往更淡定，仍在進步。 草地方面，「韋金主」助手跳兩段，健步如飛，渾身是勁，保持身壯，朝氣勃勃佳態洋溢。「飛來霸」艾兆禮跳兩段，沿途搶口要用力扣實，老毛病未改，不過不失。「會長之寶」助手跳兩段，捉得緊人馬角力，密密跑之馬有番啖火。 「枕頭之星」霍宏聲跳兩段，韁口盡斂唔急唔搶，毛色潤澤馬身夠結實。「禪勝輝煌」助手拍「快樂共濟」彈草閘，「禪勝輝煌」向來有點懶，力度只一般，未復最佳水準。「閃電小子」潘頓拍「紅海旺」彈草閘，「閃電小子」出閘冇問題，之後拖住落後順跟，聽話淡淡定。