4年贏3屆 譜寫玫瑰故事 女子隊勇奪識價盃 12/08/2024 年度盛事識價盃騎師邀請賽，前晚喺英國雅士谷馬場順利舉行，今年繼續由12位騎師分為歐洲隊、世界隊、英愛隊及女子隊競逐殊榮，不過今次世界隊3位代表都係女騎師，變成6男6女分組角逐，結果真係巾幗不讓鬚眉，6場賽事女騎師包辦4W，由英國名將杜希利領軍嘅女子隊最後一場絕地反擊，包辦頭二名席位，戲劇性贏出今屆識價盃，助女子隊近4年第3度封王，而杜希利雖然與世界隊嘅南非女將溫莉瓊同得35分，但前者贏兩W頭馬較多關係，因此成為銀馬鞍獎得主，係佢歷史性第3度贏得呢項殊榮。文：李邵霆 杜希利坐騎（右）與麥秀玲坐騎包Q，令女子隊反勝。 識價盃今年破天荒共有6位女騎師參賽，女子隊由杜希利領軍聯同法國嘅溫籮及臨時拉伕的麥秀玲，世界隊則有溫莉瓊、澳洲嘅金美琪及日本女將藤田菜七子，結果頭3關賽事，分別由溫莉瓊、杜希利及金美琪勝出，去到第4關識價盃短途賽，則輪到英愛隊嘅劉見龍建功，第5關途程2400米識價盃經典賽就由歐洲隊嘅毛振鵬力壓群雄。 金美琪為世界隊勝出其中一場。 最後一關包Q反勝 嚟到最後一關識價盃一哩賽，女子隊當時只得46分排包尾，但最終杜希利及麥秀玲的坐騎包辦冠、亞軍，成功增添25分，並以71分力壓取得60分嘅歐洲隊，再次贏識價盃。對於勇奪識價盃，兩位女子隊新丁溫籮及麥秀玲都非常開心，累積22分嘅溫籮話好榮幸可以同杜希利並肩作戰，而麥秀玲話到尾場佢哋知道要攞到頭二名先有機會絕地反擊，而最後階段當自己坐騎漸漸力弱時，佢見到後面開始有其他馬追上嚟都好擔心，而當佢見到係杜希利坐騎時，就知可以完成目標。 女子隊３代表賽後賀捷。 杜希利3奪銀馬鞍 自2006年首次參加識價盃嘅杜希利，今年創造歷史，皆因過往只得貝利、巫斯義、夏偉卓、同佢試過兩奪銀馬鞍，依家佢則3度封王，當然佢亦提到主要係坐騎實力出色，令佢交出好成績。 杜希利贏得銀馬鞍最威水。 至於由3位女將組成嘅世界隊即使失落冠軍，但有進帳嘅金美琪及溫莉瓊都非常開心，其中金美琪過去一年先後參加過日本舉行嘅世界星級騎師大賽、香港嘅國際騎師錦標賽，連同今次識價盃均能取得頭馬，而與杜希利同樣獲35分卻失落銀馬鞍獎嘅溫莉瓊，佢話好榮幸能夠於雅士谷馬場贏馬，心情非常興奮。 南非女將溫莉瓊先拔頭籌。