鈦易搵求勝心切 長風 03/01/2025 見習生減磅不是不好，但要一位7磅仔又或10磅仔騎一匹後上馬，有時想深入一點，未免有點強人所難，要知道騎放頭馬，順走順放就已經成功了大半，而騎後上馬，又要搵位又要取平衡，而望空後又要催策馬匹上前，就算是經驗老到的大師傅，騎着一匹後上馬遇着慢步速賽事，亦往往措手不及。新鮮滾熱辣例子，莫過於剛周日蔡明紹尾場的「但求開心」，馬有能力，人亦盡力，但最終亦輸在慢步速之上，後追不及僅影相輸頭位之微得季軍。 「鈦易搵」（近鏡）上仗慢步速亦追入第２名。 今次第10場三班1400米草地的「鈦易搵」，雖然配黃智弘贏過，但前仗配騎者出爭田草1200米，就後上不及只得第5名；上仗換上何澤堯執韁，增程出爭田草1400米，又一次遇上慢步速賽事，但鞍上人始終較老練，因此縱失先機，依然奮力追回第2名，只以個多馬位負於佔盡先機的「飛輪步」，後者再出已成功冧莊，反映賽事水準不俗，「鈦易搵」上仗蝕盡形勢仍剷入亞軍，今次捲土重來再跑1400米，何澤堯不放手，相信已為爭取季內首W做足準備。