康樂高球銳不可當 長風 08/02/2025 如果每一匹馬係一個故事，相信第10場「康樂高球」現正譜寫的，應該係一個奮發向上故事。此駒今季在11月尾初出，臨場愈賣愈冷成為43倍大冷門，反映備戰及信心不算充足，但馬匹跟守好位下，入到直路在「天賜喜」內側拍住鬥衝，結果直路轉兩次腳下，力拒對手來犯爆出冷W。該仗蹄下敗將跑第2名的「天賜喜」，再出兩戰全勝；至於跑第3名的「帥帥友福」，亦在最近完成兩捷，反映「康樂高球」頭馬分量絕對舉足輕重。 上仗「康樂高球」再出加了7分孭134磅，對於第2次上陣馬而言，其實有一定難度，不過有了一次實戰經驗，當然令人較有信心，結果排在9檔，早段走三疊，轉彎走五疊，可以話要蝕的都蝕晒，但最終此駒仍可以贏到全無對手，孭134磅在田草1200米造1分9秒2，今次升班再臨，孭少10磅有好無壞，對手當然會加強，但揸住咁嘅時間同表現，當真誰怕誰？