英勇快車出腳爽 匡公 06/06/2025 街坊話，左盼盼，右盼盼，夏令黃昏，喜歡賽馬，欲想沙田行，如果中午間，天氣睇預測，到6月8日，高33度，熱溶腦昏唔覺好玩，改黃昏戰，數手指算，不經不覺，連續4年，開局傍晚，決策堪讚，優惠貴賓，新猷耀眼，探子透露，到公眾棚，7時稍後，食物半價，穿梭巴士，免費送客，東鐵快捷，任君選揀，贏滿袋錢，收費好閒。 練馬冠軍，本季之爭，希斯努力，其志可讚，追唔追到？7月前夕，仍有轉寰，神仙姓蔡，自然唔怕追，看台往下望，勇馬排晒隊，周日戰黃昏，一對我關垂，星期四昨晨，5時15分，「英勇快車」助手跳半哩前慢後快，副練哥哥單車追，想必迎接隧道過程也關垂，呢課我見，泥土略濕，出腳爽朗，不覺步響，明顯輕身，當然滿意，憶記5月29朝觀操日誌，沙田泥閘，1050米，直路彎透出，竟絕塵而回，76分「健康快車」布文胯下，無法趕追，周日第9場，「英勇快車」燈下如騎對，假想敵「超力量」，可能就係「衰」畀佢。 還有「平海之星」剛剛新勝，基哥貼正，賽前從化1600米閘，段段有確吸晴，贏後周四呢課，從容有加，步如飛燕，更添輕盈，看台睇睇《東方》列示近績3程表，第一後備以為唔會咁快求添勝，豈知「滿歡笑」退出，神仙勇馬，正選馳騁，潘哥聰明冇接坐騎，樂替再拚，其父「滿樂時」，一哩冠軍，香江奪勝。