午夜快車泥地撻着 蔡俊佳 04/10/2025 馬季剛完成一個月，可能季初階段大部分馬匹都只在準備中，試閘報名馬眾多，無論香港或從化，每次出試組數就快變成與澳紐睇齊。花多眼亂，試閘只是操練上其中一個程序，試閘無負磅，從化閘更有部分由非持牌騎師主試，每個馬房在試閘仄試用意亦不同。講起試閘，另一點值得參考是場地，不少馬匹試草地與泥地走勢完全不同，就好似頭場「午夜快車」，上季7戰全敗，抖暑後復課試兩次1200米泥閘1冠1季，上場田草1400米亦有揀牠，以為落場表現應有進步，但埋門睇票數完全不對辦，結果跟跑而回。復課又試泥閘，閃閃身衝上跑第1。既然跑草地唔追，亦肯定今次要在泥地拚個明白，假若你相信血統的話，父系「雷霆夜」是「杜拜威」子嗣，外祖父Elusive Quality出過不少泥地佳駟，單看紙上泥優於草，再數數「午夜快車」運港後連同從化5次泥閘得3冠1亞1季，點都要追多次。 「午夜快車」埋門輕鬆贏出泥地試閘。 第4場「大千雄心」上季出賽兩次，初出1200米路短追近第4，再出增程跑1400米是正面部署，但質新馬可能耐力未養成，加上燈光關係走中內欄似有啲怯，名次第9距頭馬只4個半馬位，同場亞季軍今季已經取得頭馬。Ardrossan暫時在港成績最好子嗣是「仁心星」，同樣由方嘉柏訓練「大千雄心」賽前兩閘繼續由霍宏聲主理，首課泥地較平淡，但再試直路草地閘煥然一新，就如前文所言，此駒便是那種泥草地上分別甚大的馬匹。投注質新馬博前景，就如上次賽事「如蝶翩翩」，明知未夠狀態但信其能力，跑第2位置及Q位分頭不俗，「大千雄心」情況相似，既然試閘見進步，可先押一注。