至尊高超潛藏若谷 長風 12/10/2025 今季開始實施用鞭限制，雖然設有適應期，但長遠而言，一眾騎師始終要自我調節。但凡有制度改動，總有人適應得快一點，亦有人需時較長，但對於擅於用鞭者，則必然有影響。「至尊高超」能跟能鬥，季內初出已要吼實。 「至尊高超」屬艾道拿嫡系坐騎。 華將中潘明輝用鞭甚狠，而新制度下，加上手風欠順，遲遲亦未能開齋。至於洋將中，似乎艾道拿亦係適應中一員，此君用鞭狠辣，要在最後100米方能盡展所長，自然未能得心應手。其實筆者亦細心研究過，香港賽事出名緊湊，尤其快活谷轉彎入直路更不時要用鞭提醒馬匹加速，要去到最後100米方能連環用鞭，其實路程是有點太短，或許再咨詢修正時，將最後100米延長至150米或200米，對於騎師又或馬迷，會較為容易接受。 蔡約翰今季明顯較以往早郁手，在開鑼日已贏「辣得準」，之後憑「小飛俠」多添進帳，而兩駒鞍上人都係艾道拿，其實蔡約翰季內2冠5亞6季之中，竟有2冠3亞2季係出自艾道拿手，明顯蔡廐季初出擊重任，就放在此君身上。今次尾場「至尊高超」，出賽以來9戰全入三甲，當中8次更殺入連贏，既忠心又進步，的確係值得憧憬。 事實上，「至尊高超」上季1400米曾經3次獲亞，兩次是負於「光年魅力」，另一次係不敵「南區之星」，而且季尾兩仗，縱負135磅亦悉數入Q，反映馬仔細細，但負重能力卻相當不俗。