話你知亂局值敲 長風 28/10/2025 這邊廂講完上周三頻頻落飛得手，那邊廂又再出現類似情況，最誇張的自然係初出的「大愛無疆」，賽前5分鐘仍是9.4倍的半冷門，但最後着啡格成為2.8倍的大熱，信心之強、落飛之狠，當真令人咋舌。泥地向來亂局，一於小敲初跑泥地的「話你知」。 「話你知」埋門試泥閘後上入Q走勢勁。 落飛得手向來有之，但今季的情況狠得令人瞠目結舌，其中廖康銘馬房的旗下馬，就三番四次着啡格得手，剛周日「大愛無疆」着啡格2.8倍勝出之外，馬匹的走勢亦令人眼界大開，轉彎大波勾本來已輸了九成，但修正後愈衝愈勁贏接近兩個馬位，若然未有波勾意外，此駒取勝距離又會是多少？簡單一句，就係「點跑都贏」，賽前的14檔，並不叫飛的奧爾民，全部都未構成阻力。其實同日初出的「星運傳奇」一樣係信心爆棚，埋門由4倍跌至2.8倍，只不過落飛幅度未有「大愛無疆」般誇張而已。 當有一日，大多數的馬迷不再刨馬，不再相信賽績、晨操、血統，只相信「燈神」，長遠對賽馬來說，又會是好還是壞？ 今次第8場三班1650米，同場快馬不少，有「艾莉奧」、「新意馬」及「天時明駒」都係靠放食胡，如此一來，後追分子就有利可圖。「話你知」早早就印證了本身能力，雖然未跑過泥地，但埋門試泥地大閘追得好，重配最合拍的何澤堯，只要直路順利望空，絕對有得衝。