川河動駒當仁不讓 長風 23/12/2025 游達榮係筆者評價頗高的練馬師，年輕有為之外，練馬手法亦很有自己一套，季內暫時10W來自6位不同騎師，今次列陣第8場的「川河動駒」由於輕磅關係用上鍾易禮，排2檔回師最強谷中1200米，不太熱絕對值博。 「川河動駒」前仗配鍾易禮取得季軍。 「川河動駒」來港最初在黎昭昇馬房，3戰無功之後就轉投沈集成旗下，到上季8戰未勝，今季就交由游達榮接手，練者7月中接收到10月方派此駒爭谷草1200米，結果初次出賽放頭跑第7名，之後換上鍾易禮後上跑第3，既然前速、後勁俱已試準，當然以為此駒會繼續出擊，力爭轉倉後首捷，誰不知雖然強配潘頓，但就轉去跑泥地，結果跟在中後位置不上不落之下，跑了個第7名而回。 其實翻閱「川河動駒」的賽績，就會有一點啟示，就係此駒前季轉投沈廐時，曾經兩度跑泥地，結果表現平平三甲不入，但當回師谷草之後，立即票數硬淨，並且成功取得連捷。而上季中在谷草連續兩仗上名後，轉爭泥地又係落敗而回，甚至係跑包尾大敗十多個馬位，總結一句，就係此駒泥地威力遠較谷草遜色。 上仗「川河動駒」用潘頓跑泥地亦冷落至9倍，今次回師谷草負117磅，潘頓縱超2磅亦未能策騎，因此召回贏馬拍檔鍾易禮，後者難得有這個爭勝機會，自然當仁不讓，有運排埋2檔好位，跟住好位衝，有力爭取轉倉後首捷。