得道猴王大鬧1400米 長風 01/03/2026 今次尾場賽事頗為精彩，季內已經4捷的「會當凌」升班挑戰，放棄出爭香港經典盃而跑二班賽，出爭最擅長的1400米，看來有心捨難取易。不過，已經連番跑近的「得道猴王」，不等1200米而挑戰1400米，看來有心偷襲。 「得道猴王」（左）後勁及韌力俱試準。 現役共有4匹「猴王」系賽駒，其中3匹由告東尼訓練，季內4駒未有任何一匹勝出，既然係忠實支持者，告仔當然想盡快贏回一仗作交代，而3匹東廐「猴王」系賽駒，又以「得道猴王」近況最佳。此駒上季由黎昭昇馬房轉入東廐，告仔接手後贏了3仗之多，路程清一色係1200米，但要留意的，當此駒評分逐漸增加後，季尾卻在1400米殺入三甲。 由於評分加幅不少，加上體力消耗大，因此「得道猴王」踏入今季初稍作回氣非常合理，而馬匹評分漸減下，近仗一再停留在82分，依照馬匹的減分軌迹，只要練者狠下心腸，要多減2分落三班絕非難事，但馬匹在82分卻一再安排出擊，連續3仗跑3、4名，看來在練者心中，此駒根本毋須落三班，在二班一樣夠撼。 事實上，筆者亦認為「得道猴王」在二班並不下風，首先，此駒上季最後一次贏馬，就係評82分贏二班；其次，近兩仗雖然未能勝出，但馬匹走勢其實相當吸引，前仗追回第4名末段造21秒7；上仗則一度出頭僅負半馬位，後勁及韌力俱試準下，今次用鍾易禮減多2磅，有運排1檔易跟易留，屬甚有威脅的伏兵。