飛馬座轉排內檔穩賺 兆文 25/03/2026 昨朝只有「鈁糖武士」到大圈出試，由助手踱一圈，老馬識慳力，唔會展現鋒芒，身喼得壯，落腳輕快，論態保持有餘。以下是心水推介： 「飛馬座」上仗初跑谷草得第4名。 第3場「金發盛世」前仗出閘零零舍舍快過對手，上仗同樣有此表現，最後更在谷草1200米拚獲季軍，取得季內首次上名，論態全面回勇。今仗對手弱得多，而且排1檔穩守好位，若無馬肯放，自己搶放亦冇問題，形勢大好！ 第6場「皇者有利」傷患多多一抖再抖，難得目前健康理想，一定全力盡拚，睇番上仗田草獲亞，只不敵再出再贏嘅「醒目高球」，同場殿軍「環球英雄」再出補中。「皇者有利」持續操得，埋門試閘輕鬆取勝，近況吸引。 上場冇遮擋際遇差 第9場「飛馬座」上仗初次角逐谷草1200米，照樣被熱捧，可惜7檔起步，沿途被頂出三疊，尚要全程冇遮擋際遇極差，敗勿作準。「飛馬座」是能夠迅速取勝的徐廐自購馬，必擁高質，已有一場谷戰經驗，今仗再跑威力大大提升，布文再騎，排3檔有利，值得追多一次。