非惟僥倖跑法主動秤先 長風 12/05/2026 今次賽事採用C+3欄C+6彎進行，換言之即是最狹窄的賽道，季尾階段無論係沙田又或快活谷，本來已大利前置型馬匹，加上採用最狹窄賽道，因此相信前領馬匹會更加有利，第9場二班1650米，跑法主動又有一定韌力的「非惟僥倖」，值得優先留意。 「非惟僥倖」一戰谷草1650米即勝。 環顧今次同場對手，會搶的馬匹不算多，估計「太陽勇士」及「一起美麗」都有搶放本錢，而「非惟僥倖」排在3檔，既可搶前亦可稍留在包廂位，事實上，此駒在2月初贏同程時，走位就係2 2 1 1，亦即是稍留追趕絕無問題。 「非惟僥倖」上仗跑田草1800米，早段步速甚快，因此前4名馬匹全為後追，當中更有3駒係由雙位數追上，而「非惟僥倖」能夠跟前得第5名，表現已不失禮，今次回師一戰即勝的谷中一哩，有運抽埋3檔靚位，相信可衝擊季內第3W。