興馳千里情緒更穩定 兆文 03/05/2026 昨朝有3匹參戰馬到大圈出試，「幸運派彩」助手踱一圈，馬身冇瘦，神態對辦，狀態長期見好；「盈好威楓」袁幸堯踱一圈，神采奕奕，展現朝氣，觀感不遜贏馬時候；「嘉應奇兵」黃寶妮踱一圈，雙目炯炯有神，身光頸靚，外觀四正。以下是心水推介： 第9場「友瑩光」由潘頓連跑3次果然有計，上仗改變跑法一放絕塵，今次強勢再來，仲要快馬更少，值得追捧。再看剛周四試跑充滿搏殺動靜，由見習學員蔡尚謀出試，走至電算機前輕輕推騎交出凌厲衝刺，比前更弗。 第10場「櫻花酒杯」除了首戰跑法前置之外，近兩仗都傾向後追，愈見慢腳，再睇近日出跳不單止表現淡定，甚至有啲懶，安排增程跑1400米絕對正確，同時針對3歲馬負重磅蝕章，60分選戰三班賽負輕磅，同屬明智決定。 第11場「興馳千里」除了第2次出賽初孭重磅落敗之外，每一仗有出色表現，上仗影相僅負固然唔抵，但始終係第1次扳上田草1200米，初跑轉彎路程雖敗猶榮，更吸引係「興馳千里」過往在晨課未算收斂，一直要戴馬定基，近期不需要採用此項配件，情緒愈來愈穩定。