活力精神威風凜凜 兆文 11/02/2026 昨朝有兩匹參戰馬到大圈出試，同樣由助手踱一圈，「北海盜」神色唔淡，落腳夠輕快；「飛輪霸」器宇軒昂唔急唔搶，身喼得靚依然省鏡。以下是心水推介：第3場「活力精神」上仗排11檔早段蝕位被迫上前，沿途居第2位冇遮擋，對比前仗留前鬥後，完全是兩套跑法，亦可以話用錯戰略。今次扳配布文，擺到明用番後上跑法，剛周日試跑威風凜凜，勇熟程度比之前更好。 「活力精神」昨朝加課出操極生猛。 第6場「勁沙塵」今季大熟大勇，已取得3捷佳績，前仗初跑谷草一哩留到最後追上，剛戰遇超慢步速，締速唔錯更彈甩輕勝，仍戰三班賽着數到痹，今季兩次賽前進行試閘，之後上陣悉數贏馬，今次有相同安排，潘頓繼續摸實唔放，捧場更安心！ 太子貨真價實 第9場「太子」多跑下漸入佳境，前仗入位看似靠靚檔，上仗排10檔仍追上入Q，表現貨真價實。今仗更吸引到潘頓主戰，表明來意，更正斗係「太子」之前晨課表現仍帶點稚嫩，近期出跳變得淡定，出腳暢順，進度理想。