幸運子嗣田草首勝利 23/12/2012 曾由告東尼訓練嘅香港名駒「幸運馬主」，03至04年度馬季先後贏得香港一哩錦標同打吡冠軍，退役後被運到澳洲、英國配種，子嗣遍布世界各地。 幸運勝利左穿右插後上贏，姿態驚人。 「幸運馬主」子嗣之中，不乏海外一級賽盟主，但偏偏沙田草地賽事成績麻麻，跑過66戰未交出過頭馬。直至尋日沙田賽事，卒之有「幸運馬主」嘅子嗣喺田草勝出，頭場出爭四班千二米嘅「幸運勝利」，喺蔡明紹胯下以凌厲衝刺一出即勝，成功為父系爭光，而此駒馬主正係「幸運馬主」馬主梁啟徽嘅公子梁文鴻，此系人馬同告東尼攜手重溫當年「幸運馬主」沙田一出即勝嘅好夢，可謂更添一重意義。另外，蔡明紹則替平安夜生日嘅師傅率先送上頭馬做賀禮。 梁啟徽（右一） S形後上似足老竇 「幸運」系掌舵人梁啟徽對於囝囝名下「幸運勝利」，可以喺沙田賽事一出即勝，感到相當高興，他又表示此駒今戰尾段以凌厲衝刺S形後上嘅贏馬姿態，同當年「幸運馬主」一出即勝嘅情形差唔多，令佢同告東尼勾起不少愉快回憶。 對於「幸運勝利」嘅期望，梁啟徽表示此駒嘅母系Princess Carnegie當年由佢擁有，初出贏過一場千二米後，便將之退役同「幸運馬主」配種，「幸運勝利」嘅質素應該不俗，今場贏千二米其實嫌短，日後以中距離發揮較佳。