好勁寶蘭尼精心傑作 25/03/2013 有「金童子」之稱嘅蘭尼最近返咗嚟香港，除咗睇上個禮拜嘅打吡之外，仲特登留多陣睇埋尋日第三場嘅蔡廐馬「好勁寶」，事關呢隻三歲澳洲馬係佢幫馬主幸運角團體嘅成員黃清華買返嚟，結果不負所託，終點前一步擒低「太陽戰士」，順利打開勝門之餘，蘭尼又可以同一班馬主老友影張靚靚頭馬相，零舍有意義。 好勁寶馬主黃清華太太與蘭尼笑開懷。 曾想退役換過隻 賽後黃清華嘅太太講番起蘭尼做練馬師嗰時已經有支持佢，而「好勁寶」就係蘭尼喺澳洲神奇百萬拍賣會買嘅，但嚟咗香港都試咗好多次閘都未跑得，連佢都有諗過換馬，好彩蔡約翰畀足心機，今次終於出頭，佢都好開心。途程方面，黃太話「好勁寶」唔係短途馬，應該跑千四至千六米最啱腳法，前景唔差。