齊齊健康終於識贏 04/05/2015 莫雷拉同告東尼今季合作次數唔多，尋日告仔就將隻三零部隊「齊齊健康」配上雷神，估唔到騎者真係可以化腐朽為神奇，後上殺低「福駿寶」成功報捷，好鄰居團體養馬多年，終於識贏馬喇！ 齊齊健康（右）換上雷神即脫胎換骨，擊退福駿寶開胡。 尋日沙田第二場五班1400米，東廐「齊齊健康」初配莫雷拉，馬上以7倍敲響勝鼓。 好鄰居團體養馬多時，卒之等到踏進凱旋門一刻。 對於馬主好鄰居團體嚟講，呢場頭馬意義重大，事關佢哋之前養過嘅馬全部失敗收場，「左鄰右里」、「永佳寶駒」未跑過已退役，之後「友力量」跑一場包尾就玩完，而現役嘅「開心健康」同「齊齊健康」一直連披士都無，等到尋日，「齊齊健康」終於作出零的突破。 胡永權：頭馬陸續有來 好鄰居團體第一次拉頭馬，賽後團體經理人胡永權大讚雷神發揮一絕，功不可沒，胡生指出愛駒只得三歲，嚴格嚟講未完全成熟，相信下季會有更大進步空間，估計頭馬陸續有來，不妨拭目以待。