蘇保羅走出低潮 金星根冇撐錯 21/07/2015 「金碧」系馬主金星根煞科後在旗下酒家設宴，與一眾相識多年的好友及馬圈傳媒聚餐，開心歡送馬季，馬場女神Paris更準備了印有「金碧」系綵衣嘅曲奇餅，送給在場一眾賓客。與蘇保羅合作多時，雖然練者早幾季成績一般，但金星根依然力撐，如今Paul走出低潮，他也感到欣慰，並期望可以攜手再創佳績，這位義氣馬主跟Paris分享了同蘇保羅的合作點滴。 金星根與蘇保羅合作多年，十分有默契。 Paris：金生，我特登漏夜製作大批印有「金碧」系綵衣圖案嘅曲奇餅，同在場賓客分享，希望大家鍾意。 Paris自家製曲奇，金星根大讚又靚又好味。 金星根：嘩，Paris好有心思，曲奇餅好靚，影番幅相留念先！我仲以為係用整餅機做，原來全部都係你親手整，真係辛苦晒！ Paris連曲奇入盒也親力親為。 Paris：曲奇餅全部係人手製作冇防腐劑，食得健康，睇又靚，我仲識整3D綵衣同馬仔立體蛋糕，生日記住搵我呀！ 金星根對於「金碧旺旺」有一定期望。 大讚Paris入得廚房 金星根：真係入得廚房，出得廳堂，可以開埋舖頭，做老闆娘。 「金碧陽光」（左）季尾一役又輸頭位，季內第四次做阿二。 Paris：金生，唔好講我嗰筆，講番你，啱啱馬季，「金碧陽光」幾次都僅僅輸，會唔會感到失望？ 金星根：「金碧陽光」之前做過喉部手術，能夠康復重新出賽已經好滿意，何況經常有獎金收，剛季雖然冇頭馬，但夾夾埋埋有過百萬獎金，已經十分難得。呢匹馬好好鬥心，經常跑得近，但評分徘徊喺三、四班邊緣，要贏好睇形勢。不過，居三班孭輕磅始終有一定威脅，希望匹馬可以保持健健康康。 Paris：除咗「金碧陽光」之外，你仲有兩匹新血，一匹「金碧旺旺」，另一匹仲未改名添。 金碧旺旺逐漸上力 金星根：「金碧旺旺」正式只跑過兩場，季尾一次因右前蹄球節疼痛而退出。呢匹馬試閘表現唔錯，慢慢累積經驗後，來季踏入四歲會逐漸上力。至於T431則仲未改名，老實講，買入呢匹馬嗰陣，因進口證就快到期，時間趕急，未有詳細過目，質素係點要跑過先知。 Paris：你之前養過「金碧滿湖」、「金碧滿載」，不如今次改名「金碧滿庭」，或者「金碧滿滿」啦！ 金星根：好主意喎！ Paris：金生，近幾年你名下賽駒一向都擺喺蘇保羅馬房，就算Paul成績低潮嗰陣都冇轉倉，真係唔話得。 金星根：幾年前，蘇保羅替我訓練「金碧亮馬」，交出四捷佳績，令我非常滿意。雖然拉頭馬係每個馬主最大願望，但明白到呢方面絕對急唔嚟，所以就算有一段時間未嘗勝果，我都冇轉倉念頭。剛季Paul有咁好成績，我都戥佢高興，希望佢嚟緊可以幫我贏多幾場頭馬。 Paris：金生，咁預祝新季「金碧」系會有好成績！ 金星根對上一次拉頭馬乃上年6月「金碧陽光」建功。