湯智傑反擊花生友 賴嘉怡 28/08/2015 隨住網絡世界崛起，不少公眾人物都要面對網友的批評，娛樂圈的明星固然如此。而在香港馬圈，騎練的表現及成績往往成為馬迷及網友的焦點，若然鞍上人發揮差劣，自然會引起他們猛烈抨擊。近年成績長期低迷的湯智傑，更成為網友嘲笑對象。面對抨擊，究竟湯仔如何應對，不妨讓他現身說法。 湯智傑 1%勝率仲有得留低？ Q：剛季出賽成300場只贏3場（勝出率約1%），不過湯智傑留低對馬迷係好事，至少可以度少隻！ 湯智傑幾時都係老婆囝囝至上。 A：（笑）哈哈，原來我啲貼士咁勁（口架）！我真係冇諗過有人會講我喎，除咗話我死線到要爭取續牌嗰陣囉。我明白前季攞得6W，剛季攞得3W，成績梗係唔好啦。但係莫雷拉、潘頓贏到咁多場頭馬，好大程度上係佢哋經常不乏實力坐騎，而我嘅坐騎多數都係邊線或全無爭勝機會。如果換轉莫雷拉騎我手馬，相信佢都會好頭痛。我覺得若我陣上有一啲具備實力分子，都能夠發揮水準。例如剛季「金紫荊」，幾經轉手都贏唔到，最後到我手上終於勝回一仗，總算證明自己實力。 徐雨石（左） 不如轉去澳門搵食 Q：香港咁難生存，不如去澳門算吧！ 金紫荊剛季尾爆大冷，徐雨石賽後讚小湯騎得好過雷神。 A：澳門？客串就得。長期發展就唔好啦，完全冇諗過。雖然上年暑假我去澳門都有頭馬交出，但我始終都係香港馬會培訓出嚟，加上老婆同兩個仔都喺香港，所以唔會諗去其他地方。如果真係冇得續牌，我都係會轉任幕後，睇吓有咩崗位適合。不過現階段都係諗點續牌好過啦。 咁渣都咁高人工 Q：湯智傑攞就攞騎師人工福利，但陣上水準差到咁，收番佢個牌算啦！ A：啲人成日計我收入好似好多咁，但不乏計錯或者誇張成分。老實講，一啲實力唔夠或者減分等降班嘅馬匹都係需要騎師騎（口架）。我騎功好唔好大家各有評價，不過心口掛住個勇字係自己其中一個優點。一啲令唔少大師傅耍手兼擰頭嘅脾氣馬我都唔介意花時間心機落去慢慢教。好似剛季隻「天長地久」咁，曾經三次拋薛寶力落樓，初時都冇乜人願意接掌帥印。我都花咗好多時間教佢，令馬匹最終可以克服到陣前緊張問題。最終此駒喺我胯下獲得一冠一亞佳績。雖然搞咁耐、付出咁多先得一場半場頭馬，對班大師傅嚟講完全微不足道，但呢樣嘢係我最大嘅滿足感，對得住「騎師」呢份職業。 頂籠畀你玩多季 Q：有咁多人幫你簽名寫求情信，唔代表人哋到時真係支持你，新季季尾下場咪又係一樣。 A：首先我都係要多謝各位練馬師同馬主喺我最困難嘅時候伸出援手，特別係石哥，季尾畀隻「金紫荊」我，等我可以爭取番多少表現。其實我上季上陣次數有290次，喺下游騎師嚟講都唔算太少。不過我都明白到個性比較內向寡言係自己致命傷，平時除咗操馬之外，完全唔擅長同外界溝通，搞到人哋有機會時都完全唔會記起我。所以嚟緊我會努力改善自己怕醜性格同溝通能力， 藉此爭取到更多支持。當然我陣上亦會盡心盡力發揮好每一匹坐騎，有成績自然就有力說服人支持，希望下季唔使再收警告信。我兩個仔仲細，家庭負擔唔輕，仲想玩多幾年。 後記：為咗家人可以去到幾盡？ 湯智傑自出道以來，從不是馬圈中的明星，更因成績長期低迷，而被人嘲諷為馬場隱形人。但他從來沒有自暴自棄，每日晨課均見他汗流浹背，連操十匹八匹都是等閒，如此看來，下游騎師亦不易當。而現實生活中，湯智傑算是100分好爸爸，無時無刻都以老婆及一對兒子為先，堅持策騎亦全為家人生活。所以話，為咗屋企人，你可以去到幾盡？