直播爆粗遭封咪？ 阿Kit：辭職為生B 23/10/2016 梁家俊老婆李潔瑩（阿Kit），上周日於賽馬直擊節目中疑似同另一主持王若舜鬧交，期間更未熄咪就爆粗：「Sorry，我冇Ｘ...」。點知無幾耐之後就輪到王若舜穿崩，講咗一句「咁邊個辣起先呀！」，片段出街之後迅即成為網上熱話。 阿Kit年中下嫁梁家俊，現有意實行生B計劃。 據知有唔少觀眾向馬會作出投訴阿Kit爆粗，亦有消息話阿Kit同埋王若舜即時停職，直至另行通知為止。而阿Kit向本報記者透露，其實佢唔係被停職，反而係自己決定唔做，事關佢同老公梁家俊已經有生B計劃，加上已經做咗賽馬評述一段時間，係時間展開人生新一頁。阿Kit仲話馬會對佢好包容，事關馬會話如果佢喺呢段時間呈辭，好容易令人覺得同今次爆粗事件有關，但佢就唔太介意。 導演醒目Cut得快 成日話賽馬陣上形勢變幻莫測，所有動作、走位、事故都在電光火石之間發生，騎師要於短時間內作出正確判斷，真係好考功夫。不過，原來賽馬節目導演的臨場反應，甚至比騎師更靈敏，因為直播冇Take 2，騎師仲可以靠陣上形勢作出修正補救。 點解咁講？今次疑似臨場爆粗事件，就睇到導演有幾咁高招，一句「Sorry，我冇X...」個「X」字只出現咗半秒，你話如果導演當時發緊夢，又或者瞌緊眼瞓，係咪成句出晒街先？導演，你好嘢！