失落銀袋阿航搶碗補數 09/11/2016 葉楚航早排中咗甲型流感，搞到幾朝冇落晨操，好彩食咗幾日藥漸漸康復，啱啱禮拜日又靠「老友威威」打破逾一個月嘅悶局，自然藥到病除。唯一美中不足嘅係，佢訓練嘅「天才」姍姍來遲，未能捧走國際三級賽婦女銀袋囉。 「狀元才」（左）上仗谷草1200米屈居第二。 其實葉楚航一直對「天才」抱有期望，兼且馬主梁麟炳近年亦大力支持佢，好似今季擺喺葉廐A布澳洲自購馬「良才」，就係梁生囝囝梁冠華名下。咪以為現評71分嘅「良才」冇料到，呢匹馬今年6月中喺費明頓馬場初出即勝，兼且喺一場總獎金八萬澳元嘅賽事大炒對手三馬位，難怪當上手練馬師知道畀香港買家引入後，大呻自己冇咗匹好馬，就知呢匹「良才」極有潛質兼價錢唔會太低。 葉楚航 狀元才谷草打好底 既然馬主咁撐自己，葉楚航梗係想盡快交代，雖然「天才」剛周日失落婦女銀袋，但今晚隨時幫梁生贏番隻碗，事關梁冠華名下「狀元才」出戰第七場滙豐百週年紀念碗，此駒上仗初跑谷中1200米即獲第二，今次再跑同程抽一檔，有機會補中。 梁冠華（右二）名下「狀元才」，上季由韋達建功。