痛失大水喉喼神仲有星洲首富撐 01/01/2017 信和置業主席兼2016年《福布斯亞洲》新加坡富豪排行榜排首位嘅黃志祥，雖然近年較少喺馬場露面，但由佢掌舵嘅「利多」系馬匹，近期成績認真巴閉，先有囡囡黃敏音嘅「高利多」一個月內連贏兩場，而囝囝黃永光嗰匹「海利多」，啱啱喺2016年最後一次谷戰贏咗場谷草2200米大長途，順利打開在港勝門，呢個大孖沙家族呢輪真係拉頭馬拉到手軟。 高伯新 既然「利多」系近期炙手可熱，相信運勢啱啱相反嘅高伯新（喼神），肯定想借助佢哋嘅旺氣，幫自己打破悶局。如果今日喼神可以靠「肯利多」打響2017年頭炮，必定士氣大振。作為全港目前唯一嘅歐洲練馬師，高伯新今季成績的確差強人意，暫時只得兩W做包尾大幡，而且屋漏逢夜雨，前晚另一富豪馬主潘蘇通突然宣布，將名下所養四駒「大印銀紙」、「代代為王」、「大運起」及「大雄圖」全部拉往東廐，對喼神打擊甚大。 「利多」系掌舵人黃志祥 肯利多五班有着數 不過，喼神話晒贏過打吡、香港盃，一定屬有料之人，只要畀佢突破缺口，要翻身唔難。而喺今日頭場嘅「肯利多」，落到五班有啲着數，近兩仗檔位差先輸得遠，今次跑田草2000米排五檔，形勢唔錯，兼且馬主又旺，睇吓喼神能否喺新一年扭轉乾坤？ 「肯利多」