全靠巫女谷操 賴嘉怡 16/01/2017 對於運動員來說，膝傷往往是致命打擊，尤其是半月板撕裂，隨時令人無法恢復昔日水準。過往就有不少NBA球星，如史上最年輕MVP戴歷路斯因半月板撕裂休戰一段長時間，而巴西球星朗拿度亦曾受此傷患所影響。不過，上年11月9日策騎「正先生」落樓弄傷左膝半月板的意大利好手李寶利，經過兩個月的休息，已火速傷愈並定於周日復出。究竟這位意國型男點解咁快唔使再做「鐵拐李」？原來全靠女友Kimberley（巫斯義囡囡）。 唔使再揸拐杖，李寶利重現型男Look。 意大利騎師近年於歐洲馬壇炙手可熱，除了殿堂級的戴圖理，亦有目前於日本發展嘅杜滿萊同埋油王主帥艾兆禮。至於另一位意國好手李寶利，近年則選擇在法國發展，今季卻決定再度來港作短期客串，怎料未能及早開齋，更在第三個賽日就「落樓」受傷。 Kimberley（圖左） 李寶利與巫斯義囡囡（圖右） 從騎未試過跌得咁甘 談到今次意外，李寶利坦言的確影響深遠，他說：「老實說，類似『正先生』這樣恐怖的落樓意外，我並非首次經歷，但今次對我構成頗大傷害，因為要首次開刀做手術治理左膝半月板傷患，令我被迫缺陣一段時間。回想當時落樓情況，我也來不及作反應，只知被摔了落跑道，然後盡量令自己不要受傷。後來看重播才知自己好似識飛一樣。」 養傷期間健身喼弗，動力源自女友。 自從左膝半月板受傷後，李寶利最初都要用拐杖行路，但近期已見他可以行動自如出入馬場，最近更獲醫生證明可以重跨馬背。能夠克服傷患火速復出，原來女友Kimberley居功不小，他說：「既然受傷已成事實，唯一能夠是讓自己盡快康復，幸好手術做得非常成功，我也曾詢問相熟意大利醫生的建議，然後積極每天做健身及游水。不過，人總有疲倦及懶惰的時候，每當我不願做健身，女友Kimberley就提醒我不要偷懶，有佢每日提點鍛煉，是我可火速康復的原因之一。」 巫斯義 咁識賣口乖，算你啦！（設計對白） 樂做巫斯義女婿 女仔嫁個有錢人，畀人叫千億新抱，你可能覺得係童話；但掉番轉男方畀人叫五億、十億女婿 ，所承受嘅壓力外人就真係好難想像。李寶利女友Kimberly嘅爸爸，正正係貴為法國四大天王之一嘅殿堂級騎師巫斯義，所以騎者馬場上一舉一動，都難免被人攞嚟同準外父比較。李寶利就話好慶幸準外父係一個好開通嘅人，從來唔會畀佢同女友任何壓力。 策日本代表「統治地位」勇奪2012年女皇盃，為李寶利在港成名作。 同Kimberley拍拖冇壓力 李寶利表示：「我啱啱同Kimberley拍拖嗰陣確實感覺到一啲壓力，因為巫斯義喺香港馬圈真係無人不曉。不過好彩佢係一個好好相處亦都冇乜架子嘅人，而且好願意指導我哋呢啲年輕騎師。巫斯義到依家依然保持住對賽馬嘅熱誠，仲不斷取得勝仗，作為後輩去睇，佢係一個好好嘅榜樣同奮鬥目標。」 周日復出100%狀態 經過兩個月勤力做復康運動，李寶利終於脫離騎木馬嘅日子，剛周五晨課已重跨馬背，為周日復出作好準備。經歷咁嚴重傷患後，再重新踏出第一步，難怪連一向好有自信嘅佢，都話合約只係剩低大約兩個月時間（客串期至3月19日），暫時唔敢期望太多。 李寶利坦言：「我會確保自己以100%狀態回歸，盡力爭取表現，不過頭馬數字多寡始終最視乎練馬師嘅支持。由我第一次來港客串已經好鍾意呢個地方，但續唔續牌又或者會唔會延長客串期，都要考慮多方面因素，若缺乏支持，想留都冇用！所以除咗跑好啲馬之外，其他嘢我都唔會諗住。」 李寶利