股壇壞孩子踩入沙田 高時運後台夠硬 22/01/2017 今日第十場三班田草1400米有兩隻馬初次登場，一般馬迷肯定吼實「馬克羅斯」，除咗因為嚟自蕭氏家族，加埋來港前最後五戰全勝，單係呢兩點都夠照。不過，原來沈集成嗰匹初出馬「高時運」，不論馬主背景同埋賽績都非常猛料，絕對唔輸蝕o架！ 馬主 馮永祥 「高時運」馬主馮永祥（Tony）與馮尚仁（Justin）呢兩父子，就係新鴻基證券同埋新鴻基財務公司創辦人馮景禧嘅後人，素有股壇壞孩子之稱嘅Tony，就係馮景禧嘅二仔，而Justin就係佢個孫。作為地產同埋博彩業大亨，馮永祥近年將事務擴展到去育馬方面，早兩年斥巨資喺澳洲昆士蘭收購柏天勒牧場嘅訓練基地，正式改名做雅士牧場（Aquis Farm），兼且喺澳洲馬圈嘅影響力愈嚟愈大，啱啱舉行嘅澳洲神奇百萬周歲馬拍賣馬，唔少質新馬就嚟自呢個牧場。 馬主之一馮尚仁上年底入沈廐探班，並與羅理雅操練完的「高時運」合照。（Aquis Farm Facebook圖片） 外地曾力逼美麗傳承 不過，作為馮氏家族香港養馬頭炮，呢匹「高時運」就唔係由佢哋牧場培訓，反而從油王哈利法酋長手上引入，咪以為呢隻馬來港前9戰1冠成績麻麻，佢試過喺一場1400米賽事力逼「美麗傳承」。喺上年尾，作為雅士牧場CEO嘅Justin特登嚟咗香港探吓「高時運」，兼且同沈集成、羅理雅合照，今次操好先出，睇吓能否一鳴驚人？