華麗再現1800集氣 21/05/2017 沈集成算是今季香港國際馬匹拍賣會嘅大贏家，事關佢夾夾埋埋收咗七匹拍賣馬，包括由劉栢輝以1,050萬投到，史上最貴嘅「家品皇者」，真係未登場已經贏晒氣勢。 「華麗再現」季內已取3Ｗ，堪稱拍賣馬典範，沈集成（前排左二）引以為榮。 呢七匹沈廐拍賣馬新血，仲要等多一段時間先至可以上場殺敵。不過，沈集成近年嘅拍賣馬成績絕不失禮，就以上季拍賣馬為例，「華麗再現」就係代表作。 「華麗再現」 沈廐拍賣馬生招牌 或者馬迷會覺得論星味甚至評分，「華麗再現」相比「巴基之星」、「京京千里」仲有一段距離，但「華麗再現」今季已經攞到3冠1亞1季，對曾經養過累積3W拍賣馬「華麗登場」嘅馬主葉鋼華嚟講，真係有晒交代，亦證明成哥訓練拍賣馬特別有心得。 雖然「華麗再現」早排未能取得四連捷，但今次回師近兩戰全勝嘅田草1800米，兼且回配騎兩次得1W1P嘅莫雷拉，睇嚟成哥集中火力，要靠呢匹拍賣馬打破逾一個月嘅頭馬荒。