女友莎拉加持 楊明綸靚先生駁纜 18/10/2017 潮流興直播，就連楊明綸女友莎拉亦加入呢個行列，最近先後搵咗男友同埋另一位本地薑何澤堯，喺自己社交媒體平台開直播，與馬迷、粉絲互動兼解答問題，綸仔喺鏡頭前仲非常生鬼，睇嚟佢絕不抗拒女友搞直播。 莎拉 其實楊明綸又點會阻止莎拉搞直播，甚至搵佢上鏡吖，事關最近綸仔講笑話，女友搞咗兩次直播後，佢分別憑「保羅威威」及「駕悅」增添進帳，似乎幾旺佢喎。不過，如果大家有睇過佢哋直播嘅內容，就知綸仔下咗唔少苦功，好似為咗學習莫雷拉嘅美式騎法，今年暑假終於可以去美國客串學藝，同埋有人話佢較少用左手鞭，佢亦立即苦練希望改善不足之處，依家暫時攞咗四場頭馬，成績唔算失禮。 楊明綸 上周六攞到1冠3亞嘅綸仔，今晚谷戰當然想繼續贏馬攞威，第二場隻「靚先生」往績中距離較佳，今仗季內初出跑1200米，千祈唔好以為嫌短，事關呢程都跑過四次位置，加埋近兩季初出得亞殿各一，抖抖埋最好，綸仔騎羅廐馬四次得冠季各一，贏「保羅威威」更獲練馬師大讚，今次再合作自然搏到盡啦！ 「靚先生」休後復出縮程跑1200米不嫌短，楊明綸又有機會為羅富全建功。 及時行樂細場仄準 另外，第五場李廐嗰匹「及時行樂」，上仗初跑谷中1200米，突如其來爆冷跑第三，只係輸畀質新馬「友享友賞」同「指揮官」，既然證明細場性能好，今次原班人馬再攻同程，配合輕磅之利，睇吓能否幫綸仔再次贏馬?