七十七十幫蘇家轉運 03/03/2018 今日第四場四班1200米，逢出必熱嘅「八十八十」同埋首次登場嘅「七十七十」均在陣中，睇馬名以為係同主馬，查實係「七十七十」馬主蘇凱榮嘅爸爸蘇啟聲同「包裝」系嘅揸弗人李運強老友鬼鬼，而李氏旗下馬匹已棄用「包裝」命名，近兩駒分別叫做「五十五十」同「八十八十」，搞到蘇凱榮亦刻意跟風，改埋呢類咁特別嘅數字馬名。 「七十七十」上月尾潘頓試谷閘1200米9駒跑第1。 今季蘇氏一家旗下嘅馬搏極都係得個近字，蘇啟聲嗰匹「共創更好」啱啱禮拜三泥戰只得亞軍，而囡囡蘇凱欣嘅「超凡夢想」，元旦日輸個頭畀「武術冠軍」，始終同頭馬無緣。今日輪到囝囝蘇凱榮嘅「七十七十」初次出賽，話唔定可以打破缺口。無疑今場要對住擂台躉「八十八十」，但「七十七十」備戰非常完整，近三次試閘贏咗兩次，擺明唔好唔出，今次抽3檔起步形勢唔差，相信之前搏失咗「超凡夢想」嘅潘頓，應該好想憑「七十七十」幫蘇氏一家贏番場補數。 蘇啟聲（右）早前與李運強囝囝李文斌慶祝「五十五十」贏馬。