楊建文3錶齊發 22/11/2020 有「手機屏幕大王」之稱嘅伯恩光學創辦人楊建文，近年對賽馬亦有濃厚興趣，不論喺香港、澳洲甚至日本等地都有養馬。而喺月初田泥夜賽，楊建文嘅「錶」系賽駒大豐收，「錶之銳」同埋「錶之未來」雙雙建功。 楊建文 嚟到今日馬會錦標賽日，楊生決定安排3箭齊發，由「錶」系馬評分最高嘅「錶之智能」領軍，帶住「錶之銳」、「錶之未來」攜手出擊，如果3隻「錶」都贏晒，都咪話唔威水。 如果講餐士，「錶之智能」應該最高，呢匹4歲馬今季加盟告東尼馬房後續有進步，前仗先喺G3國慶盃大炒對手，剛戰挑戰G2精英碗雖然飲恨獲亞，但當日場地不利前置，「錶之智能」放得快先至輸短頭，作為目前香港銳氣較強嘅短途好手，今次抽埋1檔應該可以補中。 錶之未來草地冇問題 至於「錶之銳」、「錶之未來」由泥地新勝轉跑草地，似乎有疑問，但呂健威講過「錶之銳」已經變咗性能，依家要跑長途，所以今次跑田草1800米，亦唔可以睇小；而「錶之未來」喺澳洲根本係跑草地，兼且2戰全勝，因此轉跑田草應該冇問題。