高伯新雙福再報喜 26/12/2020 英國練馬師高伯新近年雖然因兵源所限，的確好難爭取好成績，依家佢計埋兩匹E布新血，馬房只得36駒，所以目前高廐只有4W，真係限米煮限飯嘅最佳寫照。不過，高伯新都唔係冇支持者，好似「福」系馬主鄭永安就係其中一位，近年主力將名下馬匹交畀喼神訓練，而練者亦交足功課，喺今年3月22日安排鄭生兩匹愛駒「福善」及「福逸」分途出擊，結果雙雙建功，今日沙田賽事，高伯新又作相同安排。 「福善」上仗田草2000米由郭能輕勝，並打破四班同程班際紀錄。 先講吓頭場「福善」，作為一匹4歲愛爾蘭拍賣馬，已有2冠1亞2季，上仗增程跑四班田草2000米，竟然拋離對手個幾馬位掄元兼破班際紀錄，今次立心等同程再出，面對唔少蹄下敗將，連捷係合理預期。 高伯新 福逸縮程冇問題 至於第10場嘅「福逸」，上季一出即勝後，已經被視為高廐新星，結果頭3場全勝，可惜4月尾增程初跑田草1400米敗陣，然後發現左前腿肌腱發炎，結果抖咗8個月先復出。今次跑1000米直路賽好似短啲，但睇番呢隻馬最近一課田草1000米閘嘅走勢，久休憑新鮮感縮程問題不大，睇吓能否令鄭生重溫3月時一日拉兩次頭馬嘅好夢？ 鄭永安（前排中）名下的「福善」及「福逸」於本年3月同日建功。