Simon補飛有回報 07/03/2021 掛靴後轉型從商嘅前騎師嚴顯強（Simon），依家同太太蔡曼恩都係馬主，剛周三晚谷戰佢太太嘅「度身訂做」加盟方嘉柏馬房首次上陣，可惜遇上黎海榮嘅「好友無敵」，結果輸條頸飲恨獲亞，搞到專登入場嘅Simon冇得拉頭馬。 嚴顯強夫婦 不過，如果嚴顯強想同老婆影頭馬相，話唔定今日可補飛，事關佢同老友戴偉賢夾份嘅「理想回報」角逐第2場四班1200米泥地，兼且強配潘頓出擊，機會當然樂觀。雖然「理想回報」已經8歲高齡，今季跑咗7場都有獎金收，今次由谷草1200米回師泥地同程，亦令人更添信心，話晒對上2W都喺泥地取得，況且改用啱啱禮拜三狂贏5W嘅潘頓，把握就更大。 值得一提，潘頓與呢匹「理想回報」相當合拍，上季騎5次有1冠3亞，今次重新接手負磅唔重，睇吓馬主Simon可唔可以贏番場？