轉運靠尾場 蕭百君黃金探戈 08/05/2021 蕭氏家族最近不論喺香港或英國都係差啲運氣，上周末馬會轉播嘅英國二千堅尼賽馬日，蕭百君名下嘅「黑色幽默」由人氣女將杜苑欣執韁跑1000米直路G3皇宮錦標，可惜中途塞車冇位上，最後望空幾步撲上前，但依然輸條頸畀高多芬賽駒「璧琉璃」，飲恨獲亞，非常可惜。而喺翌日沙田賽事，輪到囝囝蕭劍新嘅「地通拿」跑四班田草1000米，可惜都係逃唔過輸啲啲嘅命運，僅以短頭位之差被初出馬「嘉應精神」擊敗，連番搏殺失手，非常可惜。 馬主蕭百君 嚟到今日沙田賽事，蕭氏家族當然想盡快贏番場，尾場二班泥地1650米，揸弗人蕭百君有「黃金甲」同埋「柏林探戈」雙龍出海，「黃金甲」固然係泥地好手，即使近期一再受制於133磅，但始終有級數，今次改用手風順嘅梁家俊，話唔定有驚喜；而「柏林探戈」一早諗住引入來港跑4歲馬大賽，可惜因為馬匹進度未夠未能成事，但剛戰角逐二班谷草1800米取得殿軍，反映馬兒漸漸適應環境，本身來港前贏過膠沙地，話唔定轉場取得突破。 柏林探戈 # 黃金甲