紅旺執多15萬翻本 12/05/2021 季中兩匹同主馬「紅旺」、「紅星」接受合資格人士投標競投，最終「紅星」無人出價退役，而5歲馬「紅旺」就由俊暉團體以1,510,800港元投得，兼且繼續交畀葉楚航訓練。易主後唔夠半年，都幾乎可以肯定俊暉團體呢單投資非常成功，事關「紅旺」自從改由佢哋名下擁有後跑咗3場，取得2冠1亞，即使3場都係四班賽事，但夾夾埋埋已經攞到136萬獎金，距離回本只差15萬，今晚呢隻馬升三班再跑田草1400米，鞍上人都係贏馬功臣莫雷拉，話晒三班賽事頭馬獎金85.5萬，如果畀佢順利3連捷，唔止賺番馬價，就連今年養馬費都搵夠，所以點會唔趁勇盡拚，況且今次亦有輕磅之助，機會仍突出。 葉楚航（左）與馬主團隊祝捷。 雷神田草夜戰堅 值得一提，「紅旺」今晚出戰罕見嘅田草夜賽，而鞍上人莫雷拉原來係箇中強手，佢喺香港咁耐先後跑過11場田草夜賽，成績係5冠1亞1季非常突出，所以呢鋪「紅旺」繼續捧場啦！ 「紅旺」以151萬元易主後3戰2冠1亞，表現出色。