猛人力撐　神仙凝聚水滴 23/05/2021 啱啱禮拜三谷戰，估唔到蔡約翰亦可以增添兩W，依家領先方嘉柏3場頭馬，爭冠形勢較為樂觀。嚟到今日喺主場田草出擊，蔡神仙除咗有不敗之師「速遞奇兵」挑戰三級賽沙田銀瓶，第3場亦有「神之水滴」首度登場，隨時係佢爭冠嘅秘密武器。 蔡約翰 講開「神之水滴」，唔少人都知係同一部講述葡萄酒嘅日本漫畫同名，而呢匹3歲PPG馬主好酒好菜團體中不乏猛人，3位經理人高德謙醫生、劉錫康同埋林子雲醫生都係蔡廐支持者，佢哋之前分別有「跳出世界」、「旺蝦王」同埋「活力寶」等駒交畀蔡神仙訓練，其餘成員亦包括前亞姐冠軍陳李妮，「人和家興」馬主張明敏、「運財童子」馬主鄭惠君同埋著名馬販David Price，就知呢匹馬來頭唔簡單。 「神之水滴」最近在港的4次大閘由莫雷拉一手包辦，全入前3名。 事實上，「神之水滴」試咗7課閘先肯上陣，埋門泥閘與「風雨駒」同到，走勢吸引，況且蔡神仙訓練Mossman子嗣不乏成功例子，以往有「天下為攻」、「劍斷浪」一出即勝，而「跳出世界」、「安琛」及「皇帝法令」好快上位，今次「神之水滴」父線都係出自Mossman，不能忽視。 David Price