馬主全力支持　成哥回饋幸福 26/05/2021 「幸福」系馬主黃凱汶今季硬係差啲運氣，「幸福笑容」3月初跑一班1600米輸條頸畀「嘉應之星」，而喺上月尾嘅冠軍一哩賽遇上準馬王「金鎗六十」，結果姍姍來遲輸一步，最後黃生亦決定將愛駒轉換新環境，加盟沈集成馬房另謀發展。 「幸福友善」由潘頓埋門試泥閘第2，只負於「速遞奇兵」。 或者坊間覺得「幸福笑容」轉倉有啲奇怪，但對黃凱汶嚟講，只係歸隊性質，事關佢同囝囝黃俊銘嘅馬一早交晒畀沈集成訓練，「幸福笑容」都去埋沈廐亦合理。不過，正因為黃生嘅全力支持，成哥更要加把勁，事關即使未計「幸福笑容」，其餘4匹「幸福」系賽駒今季仲未贏過，今晚有黃俊銘嘅「幸福友善」角逐第5場四班1650米，成哥一定盡力為「幸福」打破悶局。 「幸福」系掌舵人 黃凱汶 就算唔講鬥志，「幸福友善」上仗落到四班跑同程即入位，證明依家評分有水位，今次繼續由潘頓執韁，亦有2檔之助，開齋在望。 沈集成