5歲在港初出超級軍團咩料？ 03/09/2021 周日開鑼戰有6駒首度登場，除咗試閘搶盡鏡頭嘅「緊張大師」，有冇其他新血值得留意呢？ 「超級軍團」 第10場二班1400米，就有兩匹已經5歲嘅自購馬在港初出，其中苗禮德嘅「金哥兒」貴為南非G1好望角堅尼冠軍，曾經報過上季香港經典一哩賽，可惜呢隻馬今年1月左後腿脛骨受傷，故此抖到依家先可以上陣。 至於方嘉柏訓練嘅「超級軍團」，來頭亦唔簡單，事關呢隻馬喺2020年角逐澳洲打吡取得亞軍，跑贏同場嘅「飛輪閃耀」，來港前曾角逐2400米G2鮑華錦標得第2名，反映有一定能力，只係本身已經出賽12次，進度空間未必太大，加上後期已經專攻2400米大長途，今次相隔10個月先至再踏征途，仲要縮程跑1400米配楊明綸，睇吓到時跑成點？