華卓晴順開繼續泥 29/12/2021 對於每位馬主嚟講，點樣幫愛駒改名，其實都有佢哋諗法，就以今晚第3場四班1800米嘅「華卓晴」馬主蔡奇光嚟講，佢特別鍾意將自己仔女嘅名字嵌入馬名，對上一匹「華恩庭」，正正就係用仔女嘅名字而改，至於呢匹「華卓晴」都係同一原理，卓同晴都係佢囡囡嘅名字。 「華卓晴」馬主（右二）為愛駒改名有心思。 單講成績，「華卓晴」暫時當然唔可以同曾贏三級賽嘅「華恩庭」比較，性能亦唔同，後駒係短途好手，而「華卓晴」則係中長途馬，兼且泥地性能耍家，剛戰突然增程跑泥地1800米，竟然以18倍冷門身份開齋，表現出色。 馬主蔡生話，「華卓晴」前仗喺泥地1650米跑近，因此覺得跑長啲都冇問題，結果再出加程順利補中。性能方面，蔡生雖然覺得愛駒即使回師草地都冇問題，但既然贏開泥地，今次再跑泥地1800米不無道理，睇吓能否順利再下一城？