馬主望補影頭馬相　瑪神再攞滿紛 01/05/2022 容天鵬馬房今季成績甚為不俗，暫時已經取得31W，較上季只係少咗11場，而容廐冷門不乏佳作，剛周三谷戰又有49倍冷門「正本雄心」殺入Q腳，至於最近兩個幾月逾廿倍嘅頭馬，就有「迎月」、「萬事有」、「合進駒」同埋「瑪神滿紛」，後駒今日升上三班角逐田草2000米，有冇機會再下一城呢？ 「瑪神滿紛」上仗田草1800米一放而回，爆出42倍冷W。 講起「瑪神滿紛」，馬主馬友利諾團體原來來自瑪利諾神父教會學校，之前仲養過「贏馬利諾」同埋「瑪神好運」，後駒亦係少數能夠在港贏馬嘅馬女。 馬主團體經理人敖大德 至於「瑪神滿紛」上次爆冷贏馬後，團體經理人敖大德就話其實一早知愛駒有啲質素，可惜腳部健康曾有問題，幸好得到有「容大夫」之稱嘅容天鵬悉心打理。 容天鵬 升班增程冇有怕 另外，敖大德亦提到因為母校有唔少人對賽馬有興趣，才合組養馬團體，而呢隻馬更由一位做馬販嘅校友引入，更具意義。雖然今次升上三班，但既然上仗孭130磅抽14檔都贏到田草1800米，今次增程有利無害，況且上次仲未可以入場拉頭馬，睇吓今日能否補影張頭馬相啦。