領航傳祺增程啱數 15/05/2022 「領航」系胡偉林都算係資深馬主，佢最初就同「幸運」系梁啟徽夾份養咗隻「真心動力」，初初交畀已故嘅星洲巨人愛倫訓練，後期先至轉投姚本輝及胡森馬房。不過，胡生依家養嘅「領航大帝」卻由希斯訓練，聽馬主講，因為佢同李易達好老友，所以當知道達哥恩師希斯重返香港開倉，決定給予支持，但佢自己都估唔到「領航大帝」等咗兩季，直到上月尾先喺五班谷草1200米敲響勝鼓，難怪胡生講笑話希望自己運氣好啲，頭馬陸續有嚟。 「領航傳祺」與「明月千里」同父，增程跑一哩當然合適。 至於今日角逐第2場四班1600米草地嘅「領航傳祺」，就係胡偉林囝囝胡啟聰名下愛駒，擺喺愛倫徒弟沈集成馬房。聽胡偉林講，佢都話囝囝嘅「領航傳祺」最近愈跑愈好，剛戰喺田草1400米跑第4名，相信就快可以贏馬，今次增程跑一哩，相信對呢匹「明月千里」同父馬有利無害，睇吓能否一如胡生所言，輪到囝囝胡啟聰嘅「領航傳祺」開齋啦！ 沈集成