自力更生琦妹揀手貨 01/06/2022 今年剛剛係見習騎師學校成立50周年，周日將舉行見習騎師學校50周年賽馬日，表彰見習騎師學校在過去50年來貢獻。如果要數見習騎師學校最出色嘅女學員，蔣嘉琦肯定榜上有名，話晒琦妹係香港賽馬史上贏馬最多嘅女將，又試過1日4W，兼且喺17年去杜拜獲頒最受歡迎人物獎。即使因傷提早掛靴，蔣嘉琦仍心繫馬圈，除咗出席唔少同賽馬有關嘅活動，仲做埋馬販，開咗間蔣嘉琦賽馬事業有限公司，幫相熟馬主物色良駒，最近初出以101倍跑第2名嘅「日新月著」，就係佢揀手貨。 「自力更生」周一由莫雷拉主持最後試跑渾身是勁。 今晚第8場三班1200米嘅「自力更生」，亦係琦妹親自為馬主陳志光引入，其實陳生之前嘅「好好學習」都係琦妹揀嘅，至今取得4W3P，而呢匹「自力更生」經過一段時間適應，亦連續兩場入圍，最近琦妹亦入倉探下呢匹4歲馬兼餵紅蘿蔔，睇吓今次強配莫雷拉，能否順利打開勝門？ 蔣嘉琦