羅富全順勢沾旺氣 05/06/2022 為爭取從練首個冠軍，羅富全除咗要谷盡廐內馬匹狀態，用人自然多花心思，除咗莫雷拉、潘頓兩大高手，其他手風順嘅騎師一樣要支持。好似今日沙田賽事，上仗由薛恩胯下開齋嘅「妙算騰飛」，今次因為呢位悉尼冠軍騎師停賽，立即搵連贏9日嘅梁家俊幫手，可惜尋日退出，錯過一次機會。好彩全哥仲有「順勢而飛」交由呢位手風極順嘅華將執韁，同樣有力攜手贏馬。 順勢而飛前朝由梁家俊內圈踱步精神爽利。 講起呢匹「順勢而飛」，馬主葉煒崑已經冇養馬一段長時間，今次再做馬主兼且支持羅富全，其實都算正常。事關葉煒崑喺90年代曾經養過一匹頂班灰馬「美好世界」，當時交畀愛倫訓練，曾由羅富全策騎，因此二人相識多年，今次再度合作，全哥都話非常難得。事實上，羅富全亦悉心訓練呢匹「順勢而飛」，剛戰初出跑三班谷草1000米已經有心出擊，可惜沿途蝕位只得亞軍，全哥話如果唔係出閘慢咗，應該有力一爭，今次轉爭田草1200米，兼且係盃賽場合，睇吓能否幫葉生補中兼捧盃？ 羅富全