特製應援物打氣盈嵐咁至型! 25/06/2022 依家追星，做粉絲嘅有好多方法支持自己偶像，好似親自做應援物咁啦。至於目前極受歡迎嘅男子組合同埋出道無幾耐嘅女團，佢哋嘅粉絲都會幫隊內成員整應援物打氣。 「盈嵐」上仗四班泥地一哩輕鬆開齋。 至於喺馬圈，原來馬主都鍾意幫自己愛駒整啲獨有物品打氣，今日角逐第8場三班1650米泥地嘅「盈嵐」馬主十二少團體成員就係其中之一，事關愛駒上月尾順利開齋後，佢哋一眾成員喺準備拉頭馬時，向在場傳媒展示特別訂造嘅「盈嵐」手錶及電話殼，極具特色，相信佢哋今日亦肯定會帶埋入場打氣啦。 馬主們拉頭馬時展示特別訂造的「盈嵐」電話殼及手錶。 「盈嵐」馬主十二少團體經理人何國成講，佢哋最初睇咗愛駒喺外地出賽片段，觀察到馬兒唔怕其他賽駒，亦擅於喺馬群中搵空位上前，加上只係花費百幾萬引入，價錢唔算太貴，依家來港第8次出賽就贏，佢哋當然好開心。至於點解改名做「盈嵐」，何生話自己有1子1女，佢哋最後一個名字分別叫「盈」及「嵐」，於是他就兩者加埋變成馬名。至於今次升班再跑泥地一哩，何生認為最好抽內檔，但依家排8檔，唯有靠輕磅之利爭取連捷。