喜蓮慧星大董加持 18/09/2022 今個月初馬會舉行周年大會，並由新一屆董事局選出利子厚先生為新任馬會主席，同時亦選出3位新任馬會董事，分別係胡家驃先生、龔楊恩慈女士及馮婉眉女士，當中又以胡生任期最長，為期3年去到2026年。講起呢3位新任馬會大董，馬迷比較熟悉一定係胡家驃，話晒本身係「喜蓮」系馬主之一，近年養過曾贏兩場G1嘅一哩好手「喜蓮獎星」，佢亦經常入場為愛駒打氣，依家做埋馬會大董，當然要更加積極參與，因此今季兩次賽事一樣見到胡生到場。 馬主胡家驃 今期沙田賽事，胡家驃有份嘅「喜蓮慧星」角逐第8場三班1200米泥地，亦係佢做咗馬會董事後首次派馬出擊，當然想打響頭炮，雖然呢匹告東尼馬房5歲愛爾蘭自購馬在港兩場頭馬均於谷草1650米取得，表面上跑泥地1200米嫌短，但上季曾於同程後上如飛跑第2名，只係輸畀泥地專家「新力寶」而跑贏今次同場嘅「牛皇頭」，今次揀呢場復出並非無的放矢，不能忽視。 喜蓮慧星9月6日由霍宏聲試泥閘得第5名。