激光天下初出夠照 12/02/2023 作為馬會董事局成員之一嘅陳衍里醫生，以往都係同現任馬會主席利子厚夾份養馬，先後擁有「得得天下」、「擦出火」、「百戰百勝」同埋「天下為攻」，後駒曾於2018年捧走G1主席短途獎，並成為該季最佳短途馬兼最大進步馬匹。 馬主 陳衍里醫生 不過，陳醫生最近亦試吓自己一個養馬，個人名義首匹愛駒「激光天下」今日首度登場，角逐第4場四班1200米草地，咁啱佢又係今期賽事嘅監場董事，自然希望愛駒可以一出即勝。 激光天下上月中配潘頓試泥閘大勝7個馬位。 單睇馬名「激光天下」，就知陳衍里醫生為愛駒花咗唔少心思，事關陳醫生是私人執業皮膚科專科醫生，亦是香港大學名譽臨床教授及瑪麗醫院名譽顧問醫生，同時亦做過美國內外科激光協會主席，對於點樣用激光治療，自然係專家，難怪佢會幫愛駒改名做「激光天下」，絕對係有意思。另外，黎昭昇亦對呢匹大董馬非常用心，來港後已經試咗4課閘，最近兩次仲交畀潘頓主理，走勢相當吸引，話晒潘頓正正係為「天下為攻」贏G1嘅最大功臣，睇吓今次能否為陳醫生嘅愛駒先聲奪人啦！