實力派布文爭口氣 08/03/2023 近期周不時見到2007年亞姐冠軍張珮汶（Grace）入馬場，佢從事珠寶行業嘅老公何駿杰（Adrian）亦係馬主，目前養咗「久久為攻」同埋「久久為王」，後駒啱啱禮拜日雖然再搏失，但「久久為攻」今季先後贏咗3場，上周三谷戰更成功征服三班，而早前宣布懷有第3胎嘅Grace當晚亦有入場拉頭馬，喜上眉梢。 布文 今晚跑馬地一樣有機會見到張珮汶同老公何駿杰一齊入場，事關佢老爺Adam Bin Hassan名下嘅「實力派」角逐第7場三班1200米。或者大家奇怪何駿杰同Adam Bin Hassan點解有關係，但其實何駿杰英文名係Adrian Hassan，上月中「實力派」開齋贏馬，亦見到佢哋一齊影頭馬相。今次再爭贏馬路程，由於潘頓停賽改配布文，而布文啱啱先搏失賀賢嘅一面倒熱門「一絕」，今晚自然唔想再失威，睇吓能否幫「實力派」再下一城？ 「實力派」剛戰由潘頓在谷草1200米開齋。