突破100分冇問題 維港智能5捷在望 15/04/2023 最近潘頓又收到好消息，事關佢終於可以攞到沈集成鎮倉寶「浪漫勇士」嘅帥印，即使唔係為此駒出爭月尾嘅女皇盃，但已落實與呢匹中長途好手出戰三冠大賽尾關2400米G1遮打盃，對佢嚟講都算得償所願。事關早喺季初田泰安因為甲狀腺問題養傷期間，潘頓已經為「浪漫勇士」試閘同埋試草地，可惜最終此駒搵咗麥道朗幫手跑香港盃兼順利掄元，而月尾女皇盃都係由麥道朗執韁，慶幸去到下月尾嘅遮打盃，潘頓終於同此駒首度攻堅。 沈集成 為咗報答沈集成支持，潘頓當然明白贏頭馬就係最佳回報，而今季呢對騎練合作成績平平，暫時只得4W唔算多，其中一匹正正係今日角逐第9場二班1200米嘅「維港智能」。 潘頓 呢匹4歲PPG季內6戰4勝，剛戰即使初上二班改用潘頓，結果大炒對手兩個半馬位，馬主朱潤流亦認為有潘頓幫手，的確增強唔少信心，同埋佢覺得只要愛駒繼續發揮水準，評分可望突破100分。既然係咁，「維港智能」目前評93分，肯定仲有水位，今次再攻田草1200米，有權取得季內第5W。 「維港智能」上仗在潘頓胯下輕易取得季內第4捷。