黃智弘獲騎鈦易搵 全靠師兄成全 06/05/2023 馬會牌照委員會早前公布向黃智弘（Ellis）發出見習騎師牌照，昨日舉行記者會介紹呢位新騎師。黃智弘喺2017年加入見習學員培訓計劃，其後喺2019年被馬會安排前往南澳受訓，其後喺2021年開始出賽，期間取得88場頭馬。 黃智弘（右）昨由師傅方嘉柏陪同下晤傳媒。 Ellis昨日喺見習騎師學校校長陳念慈及導師方嘉柏陪同下出席，佢表示能夠回港上陣非常開心，當得知將跟隨方嘉柏後都覺得好開心，亦慶幸跟到一個咁好嘅練馬師學習。黃智弘身高170cm及最低出賽造磅為113磅，雖然偏高，但黃智弘認為馬會有營養師設計餐單，亦有學校配合，只要按照要求進食便可，不太擔心造磅及控制體重問題。 而喺香港最欣賞嘅騎師，Ellis話分別係潘頓同埋何澤堯，潘頓騎技出色，而且陣上平衡力好；何澤堯則係好值得學習嘅師兄，展現出佢係一個好專業嘅騎師，而且賽前做足準備，好想跟佢學習。 黃智弘獲方嘉柏安排周日策騎新勝的「鈦易搵」出戰第1場1000米新馬賽，Ellis感謝方嘉柏提供咁好嘅坐騎，佢都會盡力爭取好成績。 至於方嘉柏對於馬房有新見習騎師加盟表示非常高興，自己喺本周初先知道自己申請獲批，當時感到突然，亦想提供有機會嘅坐騎予新徒弟，所以即時諗起「鈦易搵」。練者指「鈦易搵」上仗由何澤堯贏馬，今場原定都係由佢策騎，但問何澤堯可唔可以將「鈦易搵」帥權交予Ellis，而何澤堯都好樂意畀機會師弟，所以今仗「鈦易搵」改由黃智弘策騎。