包裝旋風打鐵趁熱 07/05/2023 莫雷拉上周日重臨香港客串一日，結果憑方嘉柏訓練嘅「包裝旋風」食頭胡，攞到佢今季喺香港首場勝仗，都算意義重大，同時亦為呢匹4歲英國自購馬開齋。唔知幕後係咪覺得畀雷神贏完就開竅，方嘉柏今日安排「包裝旋風」匆匆再出兼且升班再跑田草2000米，改用英國好手班德禮，擺明想打鐵趁熱執多場。 包裝旋風上周日由莫雷拉勝出田草2000米。 聽馬主李文恩講，查實「包裝旋風」前仗跑三班田草1800米表現唔差，只因塞車落敗，其後方嘉柏同李生講剛戰搵莫雷拉幫手，結果順利補中。另外，李生亦提到「包裝旋風」係佢自己親自引入，係一匹非常有潛力嘅長途馬，佢覺得由1800米至2400米都可以應付，既然係咁，今仗再跑2000米即使升上三班，但對手唔算太強，仲要孭少15磅，有望見到李生連續兩星期拉頭馬。