烈風爽快呢次博孖寶 10/05/2023 由蕭百君帶領嘅紅黑兵團喺香港馬圈勢力龐大，由蕭氏家族成員嘅賽駒包辦連贏唔算咩新鮮事，但對蕭劍平嚟講，上個月23日嘅沙田賽事應該非常難忘，事關佢一對名下馬「爽快」、「烈風」於三班泥地1650米取得頭二名，開出一條只得5.6倍嘅同主Q，蕭生就話係佢首次有個人名下馬串Q，非常難得。到咗今晚沙田全泥宴，「爽快」同埋「烈風」又再跑泥地一哩，但今次就一定唔會串Q，事關前駒已經升上二班，「烈風」則繼續於三班攻堅，但咁啱呢兩隻馬分別列陣第7、8場，一樣有機會幫蕭生包辦一口同主孖寶，到時真係一時佳話。 馬主蕭劍平 睇番馬匹近績，呢件事的確唔係無機會發生，「爽快」近兩仗轉攻泥地順利連捷，兼且都係贏兩馬位或以上，泥地性能相當耍家，難怪上仗蕭劍平都係對此駒信心大啲，今次孭少14磅，絕對有權3連捷。至於「烈風」上次蕭生覺得愛駒泥地冇咩根據，所以唔敢抱太大期望，點知跑得唔錯，今回再跑泥地一哩，睇吓呢匹父母兩線都係美國馬嘅5歲PPG能否順利補中？ 「爽快」（左）上仗與「烈風」包辦同主Q。