當年情升班冇有怕 31/05/2023 雖然香港近年嘅自購馬大多嚟自澳紐，但間中亦有馬主從英國、愛爾蘭入貨，反而去到南美洲揀蟀嘅真係少數，令人留下較深印象應該係「神駒」系呢幾年引入唔少南美兵。不過，入得廚房團體一眾成員莊維焜、張顯信同埋經理人葉思貝老公許坤華去年就引入咗阿根廷馬「當年情」，究竟係咩原因突然令佢哋去南美搵自購馬呢？ 「當年情」上仗初戰谷草即開齋。 聽馬主一眾成員講，原來入得廚房團體對上一駒「任我行」就嚟自南非，最終攞到2冠5亞兼捧過G3皇太后紀念盃，因此佢哋決定今次都喺比較冷門啲嘅地方買馬，最終揀咗約17隻先決定引入「當年情」，而佢哋一早知此乃長途馬，兼且去年暑期讓馬兒進行閹割手術，點知隻馬立即跌磅，進度比預期慢，結果未能如願爭夠分跑今屆打吡大賽。 不過，塞翁失馬，「當年情」最近進度開始改善，體重都算穩定，剛戰更有回升迹象，結果贏咗場三班谷草1800米，成班團體成員都好開心，今次升上二班再攻同程孭少11磅，即使改用蔡明紹都不能忽視。