連贏兩場未夠喉　紅愛舍再爭尾胡 03/07/2023 馬主李卓然近期原本有3駒服役，惟10歲老馬「紅麗舍」喺上個月初搵咗潘頓搏殺，可惜賽前因左前腿肌腱受傷退出，最終亦要退役，佢另一匹H布新馬「紅逸舍」4月中一出即勝後，其後3仗都贏唔到，上周三跑谷草1200米只能後上得季軍。不過，李生仲有匹4歲英國自購馬「紅愛舍」就好爭氣，即使來港早期表現平平，但最近重配本地薑楊明綸卻連贏兩場，前仗擊敗再出補中嘅「神虎龍駒」，剛戰孭135頂磅就彈甩「駟跑得」，咁啱呢兩場都係尾場。 「紅愛舍」近兩戰田草均在尾場勝出。 輪到今晚罕有嘅沙田草地夜賽，「紅愛舍」咁啱又係跑尾場，出戰二班田草1400米，鞍上人繼續用楊明綸，究竟能否為李卓然連續3次食尾胡呢？ 馬主李卓然、楊明綸 或者大家可能覺得「紅愛舍」升上二班難度高，但睇番呢隻馬評83分起步，依家先至重返呢個水平，同埋文家良都講過此駒來港初期真係有啲期望，只係英國PP始終需要時間適應水土，近期終於反彈贏咗兩場三班賽，練者都相信隻馬返回二班都可以交出成績，況且今次由135磅變122磅，加埋1檔好位，有望連食3鋪尾胡。 文家良