主帥揀騎真相未明勝在準 06/08/2023 近年英軍踩過界，作客法國G1成績都唔曳，正如今日舉行嘅紀爾斯大賽，過去9屆賽事，英國幫撳住打贏咗6屆，今屆英軍以7路大軍進襲，硬撼3件法國兵，咁主力會落響邊路人馬呢？ 「真相未明」9戰累積4冠2亞2季。（Getty Images圖片） 來自英國北部練馬師伯特，以「追諜」與「真相未明」雙龍出海，主帥李奇豐2選1，揀咗3歲仔「真相未明」，以呢匹馬9戰取4勝4位，最差一場亦跑第5名，表現準繩的確可取。 李奇豐 況且呢件黃色綵衣，自從與艾兆禮解約後，今季響大賽總有神來之筆，對上一仗由郭能響G1女皇安妮錦標，以「三拍子」爆冷捧盃，如今「真相未明」初次挑戰G1，反而只係顧累吓場地變化啫。 至於伯特另一戰駒「追諜」，今季4戰兩勝都響軟地，包括上月初響多維爾一場1200米三級賽，由李奇豐贏到無對手，雖然由G3跳級跑G1有難度，但搵到法國冠軍騎師紀仁安幫手，錦標當前各為其主，以伯特手執6場法國G1成績，往績冠絕同儕，呢鋪叫兩飛，牌面當然數佢最着數。